مجیب:مولانا محمد شفیق عطاری مدنی
فتوی نمبر:WAT-3390
تاریخ اجراء:13جمادی الاخریٰ1446ھ/16دسمبر2024ء
دارالافتاء اہلسنت
(دعوت اسلامی)
سوال
کیا بیٹی کا نام Daneen دانِین رکھ سکتےہیں؟ اس کا معنی کیا ہے؟
بِسْمِ اللہِ الرَّحْمٰنِ الرَّحِيْمِ
اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ
دانین، دانٍ کی جمع ہے، اور دانٍ کا معنی ہے:"قریب ہونے والا مرد" تو دانین کا معنی بنے گا:"قریب ہونے والے کئی مرد۔"دانٍ کی مؤنث دانیۃٌ ہے، جس کا معنی ہے: "قریب ہونے والی عورت۔" لہٰذا اگراسی لفظ سےبچی کا نام رکھناہے تو دانِین نہیں بلکہ دانیہ رکھنا چاہیے۔
البتہ! بہتریہ ہے کہ بچیوں کے نام اُمَّہاتُ المؤمنین یا دیگر صحابیات رضی اللہ عنہن یادیگرنیک خواتین رحمۃ اللہ علیہن کے نام پر رکھاجائے کہ حدیثِ پاک میں اچھے لوگوں کے نام پرنام رکھنے کی ترغیب ارشادفرمائی گئی ہے، تواس طرح اس حدیث پر عمل ہو گا، نیزامیدہے کہ اچھے نام اور ان بزرگ ہستیوں کی برکت بھی اولاد کےشاملِ حال ہو گی۔
القاموس الوحید میں ہے:”دنا منہ و الیہ ولہ دُنوًّا و دناوۃ: نزدیک ہونا، قریب آنا۔ ھو دانٍ۔۔۔ الدانی: نزدیک، لٹکا ہوا، نیچے کو جھکا ہوا۔ الدانیۃ: تانیث“(القاموس الوحید ، ص574 ، مطبوعہ ادارہ اسلامیات ، کراچی)
الفردوس بماثور الخطاب میں ہے:”تسموا بخياركم“ ترجمہ: اچھوں کے نام پر نام رکھو۔(الفردوس بماثور الخطاب، جلد2، صفحہ58، حدیث2328، دار الكتب العلمية، بيروت)
صدر الشریعہ مفتی محمد امجد علی اعظمی رحمۃ اللہ علیہ فرماتے ہیں:”بچہ کا اچھا نام رکھا جائے۔ ہندوستان میں بہت لوگوں کے ایسے نام ہیں، جن کے کچھ معنی نہیں یا اون کے برے معنی ہیں، ایسے ناموں سے احتراز کریں۔ انبیائے کرام علیہم الصلاۃ والسلام کے اسمائے طیبہ اور صحابہ و تابعین و بزرگان دِین کے نام پر نام رکھنا بہتر ہے، امید ہے کہ اون کی برکت بچہ کے شاملِ حال ہو۔“(بھار شریعت، جلد3،حصہ15، صفحہ356،مکتبۃ المدینہ، کراچی)
نوٹ: ناموں کے بارے میں تفصیلی معلومات حاصل کرنے کے لیے دعوتِ اسلامی کے مکتبۃ المدینہ کی کتاب”نام رکھنے کے احکام“ پڑھیں۔ اس میں بچوں اور بچیوں کے بہت سے اسلامی نام بھی لکھے ہوئے ہیں،وہاں سے دیکھ کر کوئی سا بھی اچھا نام رکھا جا سکتا ہے۔ نیچے دئے گئے لنک سے یہ کتاب ڈاؤن لوڈ بھی کی جا سکتی ہے۔
https://www.dawateislami.net/bookslibrary/ur/naam-rakhnay-kay-ahkam
وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم