حضرت فاطمۃ الزہراء رضی اللہ عنھا کے بیٹے بیٹیوں کی تعداد

خاتونِ جنت، سیدہ فاطمۃ الزہراء رضی اللہ تعالی عنھا کے بطنِ اطہر سے تین شہزادے اور دو شہزادیاں پیدا ہوئیں۔ رضوان اللہ تعالی علیہم اجمعین۔

شہزادوں کے نام:

(1) سیدنا امام حسن رضی اللہ تعالی عنہ

(2) سیدنا امام حسین رضی اللہ تعالی عنہ

(3) سیدنا محسن رضی اللہ تعالی عنہ (ان کا بچپن میں ہی انتقال ہوگیا تھا)

شہزادیوں کے نام:

(1) سیدتنا زینب رضی اللہ تعالی عنھا

(2) سیدتنا ام کلثوم رضی اللہ تعالی عنھا

الطبقات الکبری لابن سعد میں ہے "علي بن أبي طالب رضي اللہ عنه۔۔۔وكان له من الولد الحسن والحسين وزينب الكبرى وأم كلثوم الكبرى. وأمهم فاطمة بنت رسول اللہ، صلى اللہ تعالی عليه وآلہ وسلم ورضوان اللہ تعالی علیہم اجمعین" ترجمہ: حضرت علی رضی اللہ عنہ کی اولاد میں امام حسن، امام حسین، زینب کبری اور ام کلثوم کبری ہیں ۔اور ان کی والدہ حضرت فاطمہ بنت رسول اللہ صلی اللہ تعالی علیہ وآلہ وسلم ورضوان اللہ تعالی علیہم اجمعین، ہیں۔ (الطبقات الکبری لابن سعد، جلد 3، صفحہ 13، 14، دارالکتب العلمیۃ، بیروت)

البدایۃ و النھایۃ میں ہے "فأول زوجة تزوجها علي، رضي اللہ عنه، فاطمة بنت رسول اللہ صلى اللہ عليه و سلم، بنى بها بعد وقعة بدر، فولدت له الحسن وحسينا، و يقال: و محسنا. ومات وهو صغير، و ولدت له زينب الكبرى، و أم كلثوم الكبرى وهي التي تزوج بها عمر بن الخطاب" ترجمہ: حضرت علی رضی اللہ تعالی عنہ نے جس پہلی خاتون سے نکاح کیا، وہ رسول اللہ، صلی اللہ تعالی علیہ وآلہ وسلم کی صاحبزادی، حضرت سیدہ فاطمہ رضی اللہ تعالی عنہا ہیں، غزوہ بدر کے بعد آپ رضی اللہ تعالی عنہاکی رخصتی ہوئی، ان سے حضرت حسن اور حضرت حسین رضی اللہ تعالی عنہما پیدا ہوئے، اور یہ بھی کہا جاتا ہے کہ حضرت محسن بھی ہوئے تھے، مگر وہ بچپن ہی میں وفات پا گئے تھے۔ نیز حضرت زینبِ کبریٰ اور حضرت امِّ کلثومِ کبریٰ، رضی اللہ تعالی عنہما، بھی انہیں سے پیدا ہوئیں، اوریہ (حضرت امِّ کلثوم رضی اللہ تعالی عنہا) وہی ہیں، جن سے حضرت عمر بن خطاب رضی اللہ تعالی عنہ نے نکاح کیا۔ (البدایۃ و النھایۃ، جلد 7، صفحہ 551، مطبوعہ: بیروت)

وَاللہُ اَعْلَمُ عَزَّ وَجَلَّ وَرَسُوْلُہ اَعْلَم صَلَّی اللہُ تَعَالٰی عَلَیْہِ وَاٰلِہٖ وَسَلَّم

مجیب: مولانا محمد فراز عطاری مدنی

فتوی نمبر: WAT-5253

تاریخ اجراء: 28 محرم الحرام1448ھ/14 جولائی 2026ء