تمام انبیائے کرام علیھم السلام کو حضور ﷺ کا امتی کہنا کیسا؟

   کیا تمام انبیاء کرام علیہم السلام کو حضور صلی اللہ تعالیٰ علیہ وسلم کا امتی کہہ سکتے ہیں یا نہیں؟

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   جی ہاں کہہ سکتے ہیں کیونکہ ہمارے حضور صلی اللہ تعالٰی علیہ و آلہ وسلم  سب انبیاء کے نبی ہیں، اورتمام انبیاء و مرسلین اوران کی امتیں، سب حضور صلی اللہ تعالٰی علیہ و آلہ وسلم  کے امتی ہیں۔

   امام  عبد الرحمن بن ابي بكر، جلال الدين السيوطي (سن وفات: 911ھ) نے  خصائص الکبری  میں باقاعدہ اس  پر عنوان قائم کر کے ثابت کیا کہ تمام انبیا اور ان کے امتی  ہمارے آقا و مولا محمد مصطفی صلی اللہ تعالی  علیہ و الہ وسلم کے امتی ہیں :" فائدۃ في أنّ رسالۃ النبي صلی اللہ علیہ وسلم عامۃ لجمیع الخلق والأنبیاء وأممہم کلہم من أمتہ،"ترجمہ:فائدہ اس بارے میں کہ نبی  کریم صلی اللہ تعالی علیہ و الہ وسلم  کی رسالت تمام مخلوق کو عام ہے  اور انبیائے کرام  علی نبیناوعلیہم الصلوۃ والسلام اور ان کی امتیں، سب حضور صلی اللہ تعالی علیہ و الہ وسلم کے امتی ہیں۔(الخصائص الكبرى، ج1، ص8، دار الكتب العلمية)

   سیدی اعلیٰ حضرت الشاہ امام احمد رضا خان علیہ رحمۃ الرحمن آیہ کریمہ"وَ اِذْ اَخَذَ اللّٰهُ مِیْثَاقَ النَّبِیّٖنَ" کے تحت ارشاد فرماتے ہیں :"امام علامہ تقی الملۃ والدین ابوالحسن علی بن عبدالکافی سبکی رحمۃ اللہ تعالی علیہ نے اس آیت کی تفسیر میں ایک نفیس رسالہ ''التعظیم والمنہ فی لتؤمنن بہ ولتنصرنہ''لکھا۔ اوراس میں آیت مذکورہ سے ثابت فرمایا کہ ہمارے حضور صلوات اللہ تعالٰی وسلامہ علیہ سب انبیاء کے نبی ہیں، اورتمام انبیاء ومرسلین اوران کی امتیں سب حضور کے امتی۔ حضور کی نبوت ورسالت زمانہ سیدنا ابوالبشر علیہ الصلٰوۃ والسلام سے روز قیامت تک جمیع خلق اللہ کو شامل ہے۔"(فتاوی رضویہ، ج30، ص130تا138، مطبوعہ:رضا فاؤنڈیشن، لاہور)

   خلیفہ اعلی حضرت، صدرشریعت، بدرطریقت، حضرت علامہ مولانامفتی محمدامجدعلی اعظمی علیہ الرحمۃ اپنی تصنیف جلیل بہار شریعت میں تحریرفرماتےہیں: "سب سے پہلے مرتبہ نبوّت حضور (صلی اﷲ تعالیٰ علیہ وسلم) کو ملا۔ روزِ میثاق تمام انبیا سے حضور (صلی اﷲ تعالیٰ علیہ وسلم) پر ایمان لانے اور حضور (صلی اﷲ تعالیٰ علیہ و سلم) کی نصرت کرنے کا عہد لیا گیااور اِسی شرط پر یہ منصبِ اعظم اُن کو دیا گیا۔ حضور (صلی اﷲ تعالیٰ علیہ وسلم) نبی الانبیا ہیں اور تمام انبیا حضور (صلی اﷲ تعالیٰ علیہ وسلم) کے اُمّتی، سب نے اپنے اپنے عہدِ کریم میں حضور (صلی اﷲ تعالیٰ علیہ وسلم) کی نیابت میں کام کیا، اﷲ عزوجل نے حضور (صلی اﷲ تعالیٰ علیہ وسلم) کو اپنی ذات کا مظہر بنایا اور حضور (صلی اﷲ تعالیٰ علیہ وسلم) کے نُور سے تمام عالَم کو منوّر فرمایا۔"(بہار شریعت، ج1، ص85، ص 86، مکتبۃ المدینہ کراچی)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم