دار الافتاء اھلسنت (دعوت اسلامی)
اسماء الحسنی کسے کہتے ہیں؟
بِسْمِ اللہِ الرَّحْمٰنِ الرَّحِيْمِ
اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَايَةَ الْحَقِّ وَ الصَّوَابِ
اسماء الحسنی کا لغوی معنی ’’بہت اچھے نام‘‘ ہے۔ اور عمومی طور پر اسماء الحسنی اللہ عزوجل کے مبارک ناموں کے لئے بولا جاتا ہے۔ قرآن کریم میں ہے:
﴿فَلَهُ الْاَسْمَاءُ الْحُسْنٰی﴾
ترجمہ کنز الایمان: اور اللہ ہی کے ہیں بہت اچھے نام۔ (پارہ 9، سورت الاعراف، آیت 180)
احادیث میں اسمائے مبارکہ کے بہت فضائل بیان فرمائے گئے ہیں، جن میں سے دو احادیث ملاحظہ فرمائیں: بخاری شریف میں ہے
عن أبي هريرة: أن رسول الله صلى الله عليه و سلم قال: إن لله تسعة و تسعين اسما، مائة إلا واحدا، من أحصاها دخل الجنة
ترجمہ: حضرت ابو ہریرہ رضی اللہ عنہ سے روایت ہے، رسول اللہ صلی اللہ تعالی علیہ وآلہ وسلم نے فرمایا: اللہ عز و جل کے ننانوے (ایک کم سو)نام ہیں، جس نے انہیں یاد کر لیا وہ جنت میں داخل ہوگا۔ (صحیح بخاری، کتاب التوحید، باب إن لله مائة اسم إلا واحدا، ج 9، ص 118، دار طوق النجاة)
جامع الاحادیث للسیوطی میں ہے
عن أبي هريرة، إن لله تعالى مائة اسم غير اسم، من دعا بها استجاب الله له
ترجمہ: حضرت ابو ہریرہ رضی اللہ عنہ سے روایت ہے: اللہ عزوجل کے ننانوے نام ہیں، جس نے ان کے وسیلے سے دعا کی اللہ عزوجل اس کی دعا قبول فرمائے گا۔ (جامع الاحادیث، ج 2، ص 382، حدیث 6109، دار الفکر، بیروت)
وَ اللہُ اَعْلَمُ عَزَّ وَ جَلَّ وَ رَسُوْلُہ اَعْلَم صَلَّی اللہُ تَعَالٰی عَلَیْہِ وَ اٰلِہٖ وَ سَلَّم
مجیب: مولانا محمد نوید چشتی عطاری مدنی
فتویٰ نمبر: WAT-897
تاریخ اجراء: 13 ذیقعدۃ الحرام 1443ھ / 13 جون 2022ء