مجیب:ابو تراب محمد علی عطاری
مصدق:مفتی محمد قاسم عطاری
فتوی نمبر:PIN-7507
تاریخ اجراء:21ربیع الاول1446ھ/26ستمبر 2024ء
دارالافتاء اہلسنت
(دعوت اسلامی)
سوال
کیا فرماتے ہیں علمائے دین و مفتیان شرع متین اس بارے میں کہ منت کے متعلق میرے دو سوال ہیں:
(1) اگر 10فقراء کو کھانا کھلانے کی منت مانی، تو کیا انہیں کھانا کھلانا ہی ضروری ہو گا یا اس کے بدلے رقم بھی دے سکتے ہیں؟
(2) نوافل ادا کرنے کی منت مانی، تو ان نوافل کو بیٹھ کر بھی پڑھ سکتے ہیں یا پھر کھڑے ہو کر ہی ادا کرنے ہوں گے؟
بِسْمِ اللہِ الرَّحْمٰنِ الرَّحِيْمِ
اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ
(1) فقراء کو کھانا کھلانے کی منت مانی، تو یہ منت شرعی ہے، جسے پورا کرنا واجب ہے، البتہ انہیں کھانا دینا ہی ضروری نہیں، بلکہ 10 افراد کو کھانے کی بجائے فی کس ایک صدقہ فطر یا اس کی قیمت بھی دی جا سکتی ہے، کیونکہ فقیر کو کوئی چیز دینے کی منت ماننے سے مقصود حصولِ ثواب اور اس کی حاجت پوری کرنا ہوتا ہے، تو متعین چیز کی بجائے اس کی قیمت دینے سے بھی یہ مقصد حاصل ہو جاتا ہے او ر ایک فرد کے کھانے کا متبادل شریعت مطہرہ نے ایک صدقہ فطر مقرر فرمایا ہے، لہذا فقراء کو صدقہ فطر یا اس کی قیمت بھی دے سکتے ہیں۔
منت پوری کرنے کے متعلق قرآن کریم میں ہے:﴿وَ لْیُوْفُوْا نُذُوْرَهُمْ﴾ ترجمہ کنزا لایمان :’’اور اپنی منتیں پوری کریں۔‘‘(پارہ17، سورۃ الحج، آیت 29)
منت میں متعین کردہ چیز کے بدلے قیمت دینے کے متعلق درر الحکام میں ہے: ’’(جاز دفع القيم في الزكاة و كفارة غير الاعتاق والعشر والنذر) يعني ان اداء القيمة مكان المنصوص عليه في الصور المذكورة جائز‘‘ ترجمہ: زکوۃ، غلام آزاد کرنے والے کفارے کے علاوہ کسی دوسرے کفارے، عشر اور منت میں قیمت دینا بھی جائز ہے۔(درر الحکام، کتاب الزکاۃ، جلد1، صفحہ178، مطبوعہ بیروت)
فقیر کو کوئی چیز دینے کی منت کا مقصد قیمت دینے سے بھی پورا ہو جاتا ہے۔چنانچہ در مختار اور رد المحتار میں ہے: ’’(وجاز دفع القيمة في زكاة وعشر وخراج وفطرة ونذر۔۔الخ) كان نذر ان يتصدق بهذا الدينار فتصدق بقدره دراهم او بهذا الخبز فتصدق بقيمته جاز عندنا، ۔۔۔ لان المقصود اغناء الفقير وبه تحصل القربة وهو يحصل بالقيمة‘‘ ترجمہ: زکوۃ، عشر، خراج، فطرہ اور منت میں قیمت دینا بھی جائز ہے، ۔۔ جیسے یہ منت مانی کہ یہ دینار صدقہ کروں گا، تو اس کی مالیت کے برابر دراہم اور منت مانی کہ یہ روٹی صدقہ کروں گا، تو ہمارے نزدیک اس کی قیمت دینا بھی جائز ہے،۔۔ کیونکہ (ان تمام منتوں سے) مقصود فقیر کو غنی کرنا اور قربت کا حصول ہے اور یہ مقصد قیمت دینے سے حاصل ہو جائے گا۔(رد المحتار مع در مختار، کتاب الزکاۃ، جلد 2، صفحہ 286، مطبوعہ بیروت)
بہار شریعت میں ہے:’’اگر فقیروں کے کھلانے کی منت مانی، تو جتنے فقیر کھلانے کی نیت تھی، اتنوں کو کھلائے،۔۔ یا صدقہ فطر کی مقدار ان کو دے۔(بھار شریعت، حصہ9، صفحہ315، مکتبۃ المدینہ، کراچی)
نوٹ: ایک صدقۂ فطر کی مقدار آدھا صاع (دو کلو میں اَسی گرام کم یعنی 1920 گرام) گندم یا ایک صاع (چار کلو میں ایک سو ساٹھ گرام کم یعنی 3840 گرام) جَو یا کھجور یا کشمش یا ان کی قیمت بنتی ہے۔
(2)نوافل کی منت ماننے والے نے کھڑے ہو کر پڑھنے کی منت نہیں مانی، بلکہ مطلق نماز کی منت مانی، تو راجح قول کے مطابق اسے اختیار ہے کہ چاہے کھڑے ہو کر نوافل ادا کرے یا بیٹھ کر، بہر صورت منت پوری ہو جائے گی، البتہ اگر منت میں کھڑے ہو کر پڑھنے کی شرط عائد کی، تو پھر کھڑے ہو کر ہی ادا کرنے ہوں گے۔
منت میں صراحت نہ کی، تو قیام لازم نہیں۔ برہان الاسلام امام رضی الدین محمد بن محمد سرخسی علیہ الرحمۃ فرماتے ہیں: ’’لو نذر ان یصلی مطلقاً لم یلزمہ القیام وھو الصحیح، لان القیام زیادۃ صفۃ فی التطوع فلا یلتزم الا بالشرط“ ترجمہ: اگر کسی نے مطلق نماز کی منت مانی تو اس پر قیام لازم نہیں، یہی صحیح قول ہے کیونکہ قیام نفل نماز میں ایک زائد وصف ہے، لہذا بغیر شرط کیے لازم نہیں ہوگا۔(المحیط الرضوی، کتاب الصلوۃ، باب التطوع المطلق، جلد1، صفحہ271، دار الکتب العلمیۃ، بیروت)
علامہ محقق شیخ ابراہیم حلبی رحمۃ اللہ علیہ فرماتے ہیں: ’’اذا نذر ولم یلتزم فی نذرہ صفۃ القیام وقال فی الکافی: لم یلزمہ القیام فی الصحیح، لان القیام وراء ما یتم بہ التطوع، فلا یلزمہ الا بالتنصیص علیہ‘‘ ترجمہ: جب کسی شخص نے نماز کی منت مانی اور اس میں قیام کو ذکر نہیں کیا، کافی میں ہے: صحیح قول کے مطابق قیام لازم نہیں ہو گا، کیونکہ نفل نماز کی تکمیل میں جو چیزیں لازم ہیں، ان میں قیام ایک اضافی چیز ہے اور یہ نفل میں تب ہی لازم ہو گا جب اس کی صراحت مذکور ہو۔(غنیۃ المتملی، فصل فی النوافل، صفحہ396، مطبوعہ کوئٹہ)
منت میں کھڑے ہو کر پڑھنے کا ذکر کیا، تو قیام لازم ہو گا۔ چنانچہ فتاوی عالمگیری میں ہے: ’’نذر ان یصلی رکعتین فصلاھما قاعداً جاز۔۔۔ ولو نذر ان یصلی قائماً، یلزمہ قائما‘‘ ترجمہ: منت مانی کہ دو رکعت ادا کروں گا، پھر اس نے دو رکعتیں بیٹھ کر پڑھ لیں، تو درست ہے،۔۔ اور اگر منت مانی کہ کھڑے ہو کر پڑھے گا، تو قیام کے ساتھ پڑھنا لازم ہے۔(فتاوی عالمگیری، کتاب الصلاۃ، باب النوافل ومما یتصل بذلک مسائل، جلد1، صفحہ127، مطبوعہ کراچی)
بہار شریعت میں ہے: اگر کھڑے ہو کر پڑھنے کی منت مانی، تو کھڑے ہو کر پڑھنا واجب ہے اور مطلق نماز کی منت مانی، تو اختیار ہے۔(بھار شریعت، حصہ4، صفحہ674، مکتبۃ المدینہ، کراچی)
وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم