ٹھیکے پر لی گئی زمین پر عشر دینے کا طریقہ؟
ٹھیکے پر لی ہوئی زمین کا عشر ٹھیکہ نکال کر دیا جائے گا یا پہلے؟
مجیب:مولانا فرحان احمد عطاری مدنی
فتوی نمبر:Web-1644
تاریخ اجراء:02ذوالقعدۃ الحرام1445 ھ/11مئی2024 ء
دارالافتاء اہلسنت (دعوت اسلامی)
سوال
ہم نے زمین فکس رقم میں ٹھیکے پر لی ہوئی ہے اس پر جو فصل کا عشر ہوگا وہ ٹھیکہ نکال کر ہوگا یا ٹھیکے کے ساتھ ہوگا؟
جواب
بِسْمِ اللہِ الرَّحْمٰنِ الرَّحِیْمِ
اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ
پوچھی گئی صورت میں عشر مکمل پیداوار پر ہے اور عشر نکالتے وقت ٹھیکہ اور دیگر اخراجات مائنس نہیں ہوں گے لہٰذا آپ پر لازم ہے کہ پہلے ٹھیکے اور دیگر اخراجات کو مائنس کیے بغیر مجموعی پیداوار میں سے عشر ادا کریں اس کے بعد ہی ٹھیکے اور دیگر اخراجات پورے کریں۔
بہارشریعت میں ہے: جس چیز میں عشر یا نصف عشر واجب ہوا، اس میں کل پیداوار کا عشر یا نصف عشر لیا جائے گا، یہ نہیں ہو سکتا کہ مصارفِ زراعت، ہل بیل، حفاظت کرنے والے اور کام کرنے والوں کی اجرت یا بیج وغیرہ نکال کر باقی کا عشر یا نصف عشر دیا جائے۔ (بہارشریعت، جلد1، صفحہ918، مکتبۃالمدینہ، کراچی)
وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم