جوئے کے بغیر تاش کھیل سکتے ہیں؟

کیا جوئے کی شرط کے بغیر بھی تاش کھیلنا بھی گناہ ہے؟

جواب

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَ الصَّوَابِ

جی ہاں! تاش کھیلنا مطلقاً ناجائز و گناہ ہے چاہے جوئے کی شرط ہو یا نہ ہو، کہ اس میں لہو و لعب کے علاوہ تصاویر کی تعظیم بھی پائی جاتی ہے۔

سیدی اعلیٰ حضرت امامِ اہلسنت امام احمد رضا خان رحمۃ اللہ علیہ فرماتے ہیں: ”تاش اور اسی طرح گنجفہ بوجہ اشتمال و اعزازِ تصاویر مطلقاً بلاشرط ممنوع و ناجائز ہے اور مصروف رہنا فسق۔ در مختار میں ہے:

کرہ کل لھولقولہ صلی ﷲتعالٰی علیہ و سلم کل لھوالمسلم حرام الا ثلثۃ ملاعبتہ اھلہ و تادیبہ لفرسہ و مناضلتہ بقوسہ۔

ہر کھیل مکروہ ہے حضور انور صلی اﷲ تعالیٰ علیہ و سلم کے اس ارشاد کی بنا پر کہ مسلمان کا ہر کھیل حرام ہے سوائے تین کھیلوں کے: اپنی بیوی سے ملاعبت کرنا اور اپنے گھوڑے کی تعلیم وتادیب کرنا اور سبقت کےلئے اپنی کمان سے تیر اندازی کرنا (ت)۔“ (فتاوی رضویہ، جلد 16، صفحہ 560 ۔ 561، رضا فاؤنڈیشن، لاہور)

دوسرے مقام پر فرماتے ہیں: ”گنجفہ تاش حرام مطلق ہیں کہ ان میں علاوہ لہوولعب کے تصویروں کی تعظیم ہے۔“ (فتاوی رضویہ، جلد 24، صفحہ 141، رضا فاؤنڈیشن، لاھور)

وَ اللہُ اَعْلَمُ عَزَّ وَ جَلَّ وَ رَسُوْلُہ اَعْلَم صَلَّی اللہُ تَعَالٰی عَلَیْہِ وَ اٰلِہٖ وَ سَلَّم

مجیب: مولانا عابد عطاری مدنی

فتوی نمبر: Web-2251

تاریخ اجراء: 15شوال المکرم1446ھ/14اپریل2025ء