دار الافتاء اھلسنت (دعوت اسلامی)
سوال
کیا قرآن پاک سن کر ایصال ثواب ہو سکتا ہے؟
جواب
بِسْمِ اللہِ الرَّحْمٰنِ الرَّحِيْمِ
اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَ الصَّوَابِ
قرآن پاک ثواب کی نیت سے سننے کا بھی ثواب ہوتا ہے، اور ہر عمل کے ثواب کا ایصال ہو سکتا ہے، لہذا قرآن پاک سن کر اس کا ایصال ثواب ہو سکتا ہے۔ حدیث پاک میں ہے
”من استمع إلى آية من كتاب الله عز وجل كتب له حسنة مضاعفة“
ترجمہ: جس نے قرآن کی ایک آیت سنی، تو اس کے لیے کئی گنا اجر لکھا جائے گا۔ (مصنف عبد الرزاق، ج 3، ص 373، رقم الحدیث 6013، المجلس العلمی، الھند)
فتاوٰی ہندیہ میں ہے
”الأصل في هذا الباب أن الإنسان له أن يجعل ثواب عمله لغيره صلاة كان أو صوما أو صدقة أو غيرها كالحج و قراءة القرآن و الأذكار و زيارة قبور الأنبياء عليهم الصلاة و السلام و الشهداء و الأولياء و الصالحين و تكفين الموتى و جميع أنواع البر، كذا في غاية السروجي شرح الهداية“
یعنی اس باب میں قاعدہ یہ ہے کہ انسان کے لئے جائز ہے کہ اپنے عمل کا ثواب دوسرے کو ہبہ کر دے، وہ عمل نماز ہو یا روزہ یا صدقہ یا ان کے علاوہ، جیسا کہ حج اور تلاوتِ قرآن اور اذکاراور انبیائے کِرام علیہم الصلاۃ و السلام، شہداء، اولیاء اور صالحین کے مزارات کی زیارت اور مردوں کو کفن دینا اور نیک کاموں کی تمام اقسام، اسی طرح ہدایہ کی شرح غایۃ السروجی میں مذکور ہے۔ (فتاوٰی ھندیۃ، کتاب المناسک، ج 01، ص 257، دار الفکر، بیروت)
وَ اللہُ اَعْلَمُ عَزَّ وَ جَلَّ وَ رَسُوْلُہ اَعْلَم صَلَّی اللہُ تَعَالٰی عَلَیْہِ وَ اٰلِہٖ وَ سَلَّم
مجیب: مولانا محمد ابوبکر عطاری مدنی
فتوی نمبر: WAT-3836
تاریخ اجراء: 19 ذو القعدۃ الحرام 1446 ھ/ 17 مئی 2025 ء