نعیم نام کا مطلب اور یہ نام رکھنا کیسا؟

   نعیم کا کیا معنی ہے اور یہ نام رکھنا کیسا ہے؟

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   نعیم کے معانی ہیں ":نعمت۔ صاحب نعمت، نعمت والا۔ وغیرہ۔" اور ان معانی کے لحاظ سے نعیم نام رکھنا جائز ہے۔ البتہ بہتر یہ ہے کہ بچے کانام نیک لوگوں کے نام پررکھاجائے کہ حدیث پاک میں اس کی ترغیب ہے نیزاس سے امید ہے کہ ان نیکوں کی برکت بچے کے شامل حال ہوگی۔ الفردوس بماثور الخطاب میں ہے "تسموا بخياركم“ ترجمہ: اپنوں میں سے اچھوں کے نام پر نام رکھو۔ (الفردوس بماثور الخطاب، جلد 2، صفحہ 58، حدیث 2329، دار الكتب العلمية، بيروت)

   بہار شریعت میں ہے "بچہ کا اچھا نام رکھا جائے۔ ہندوستان میں بہت لوگوں کے ایسے نام ہیں جن کے کچھ معنی نہیں یا اون کے برے معنی ہیں ایسے ناموں سے احتراز کریں۔ انبیائے کرام علیہم الصلاۃ والسلام کے اسمائے طیبہ اور صحابہ و تابعین و بزرگان دِین کے نام پر نام رکھنا بہتر ہے امید ہے کہ اون کی برکت بچہ کے شامل حال ہو۔" (بہار شریعت، جلد 3، حصہ 15، صفحہ 356، مکتبۃ المدینہ، کراچی)

   فیروزاللغات میں ہے "نعیم:نعمت۔۔۔صاحب نعمت ۔نعمت والا۔" (فیروز اللغات، ص 1434، فیروز سنز)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم