طلاق کے بعد پیدا ہونے والی بیٹی وراثت کی حقدار ہے؟

پوچھی گئی صورت میں طلاق کے بعد پیدا ہونے والی لڑکی زید کی ہی بیٹی ہے اور شرعی طور پر دیگر بہن بھائیوں کی طرح وہ بھی اپنے والد کی وراثت کی حقدار ہے، پھر جب وہ اپنے والد کی وارث ہے، تو اسے والد کی میراث سے محروم کرنا صریح ظلم، سخت ناجائز و حرام اور کبیرہ گناہ ہے، لہذا جو بھی اسے شرعی حصہ سے محروم کرے گا، سخت گناہ گار اور عذابِ نار کا حقدار ہو گا اور قرآن و حدیث میں ایسے افراد کے لئے سخت وعیدیں بیان کی گئی ہیں، اس لئے جب بھی وراثت تقسیم کی جائے، بقیہ ورثاء کے ساتھ اس لڑکی کو بھی مالِ وراثت میں اس کا پورا حق دیا جائے۔

اولاد کی وراثت کے متعلق ارشادِ باری تعالیٰ ہے:﴿یُوْصِیْكُمُ اللّٰهُ فِیْۤ اَوْلَادِكُمْۗ- لِلذَّكَرِ مِثْلُ حَظِّ الْاُنْثَیَیْنِۚ-﴾ترجمۂ کنز الایمان: اللہ تمہیں حکم دیتا ہے تمہاری اولاد کے بارے میں بیٹے کا حصہ دو بیٹیوں برابر ہے۔ (پارہ4، سورۃ النساء، آیت 11)

طلاق کے بعد مدتِ حمل میں پیدا ہونے والی لڑکی، زید کی بیٹی اور اس کی وارث ہے۔  فتاوی عالمگیری میں ہے: لو طلقھا بعد الدخول، ثم جاءت بولد یثبت النسب الی سنتین و تنقضی العدۃ بہ‘‘ ترجمہ: اگر کسی شخص نے دخول کے بعد بیوی کو طلاق دی، پھر وہ بچہ پیدا کرے، تو (وقتِ طلاق سے)دو سال کی مدت تک بچہ جننے کی صورت میں اس بچے کا نسب مذکورہ شخص سے ثابت ہو گا اور اس کی ولادت پر عورت کی عدت پوری ہو جائے گی۔ (فتاوی عالمگیری، کتاب الطلاق، الباب الخامس عشر فی ثبوت النسب، جلد 1، صفحہ 537، مطبوعہ بیروت)

فقیہ ملت حضرت علامہ مولانا مفتی جلال الدین احمد امجدی رحمۃ اللہ علیہ سے سوال ہو اکہ طلاق کی عدت میں پتہ چلا کہ عورت حاملہ ہے، تو حمل والے بچے کا کیا حکم ہوگا؟ تو آپ علیہ الرحمۃ نے جواباً ارشاد فرمایا: اگر وقتِ طلاق سے دو سال یا اس سے کم پر لڑکا پیدا ہوا، تو وہ طلاق دینے والے شوہر کا ہے ۔ ۔ ۔ اور زید کی موت کے بعد بچہ اس کی جائیداد کا وارث بھی ہو گا۔ (فتاوی فیض الرسول، جلد 2، صفحہ 323،شبیر برادرز، لاہور)

کسی کا مالِ وراثت کھا جانا زمانہ جاہلیت کا دستور ہے۔ اللہ عزوجل قرآن کریم میں ارشاد فرماتا ہے: ﴿وَ تَاْکُلُوْنَ التُّرَاثَ اَکْلًا لَّمًّا﴾ ترجمہ کنز العرفان: اور میراث کا سارا مال جمع کر کے کھا جاتے ہو۔ (پارہ 30، سورۃ الفجر، آیت 19)

اس آیت کے تحت تفسیرِ صراط الجنان میں ہے: یہاں کفار کی تیسری خرابی اور ذلت کا بیان ہے کہ تم میراث کا مال کھا جاتے ہو اور حلال و حرام میں تمیز نہیں کرتے اور عورتوں اور بچوں کو وراثت کا حصہ نہیں دیتے، بلکہ ان کے حصے خود کھا جاتے ہو، جاہلیت میں یہی دستور تھا۔ اس بیان کردہ ظلم میں بہت سی صورتیں داخل ہیں اور فی زمانہ جو چچا، تایا قسم کے لوگ یتیم بھتیجوں کے مال پر قبضہ کر لیتے ہیں یا روٹین میں جو بہنوں، بیٹیوں یا پوتیوں کو وراثت نہیں دی جاتی، وہ بھی اسی میں داخل ہے کہ شدید حرام ہے۔ (تفسیرِ صراط الجنان، جلد 10، صفحہ 668، مکتبۃ المدینہ، کراچی)

کسی وارث کی میراث نہ دینے سے متعلق نبی کریم صلی اللہ علیہ وآلہ وسلم نے ارشاد فرمایا: من فر من ميراث وارثه، قطع الله ميراثه من الجنة يوم القيامة“ ترجمہ: جو وارث کو میراث دینے سے بھاگے، اللہ قیامت کے دن جنت سے اس کی میراث قطع فرما دے گا۔ (سنن ابن ماجہ، کتاب الوصایا، صفحہ 194، مطبوعہ کراچی)

میراث میں بہنوں کو حصہ نہ دینے کے متعلق اعلیٰ حضرت امام احمد رضا خان رحمۃ اللہ علیہ فرماتے ہیں: لڑکیوں کو حصہ نہ دینا حرامِ قطعی ہے اور قرآن مجید کی صریح مخالفت ہے۔قال اللہ تعالی: ﴿یُوْصِیْكُمُ اللّٰهُ فِیْۤ اَوْلَادِكُمْۗ- لِلذَّكَرِ مِثْلُ حَظِّ الْاُنْثَیَیْنِۚ-﴾۔ (فتاوی رضویہ، جلد 26، صفحہ 314، رضا فاؤنڈیشن، لاہور(