Ek Mashhoor Sher Ka Shari Hukum

   خودی کو کر بلند اتنا کہ ہر تقدیر سے پہلے                                                                         خدا بندے سے خود پوچھے بتا تیری رضا کیا ہے

   معلوم یہ کرنا ہے کہ یہ شعر پڑھنے کا کیا حکم ہے؟

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   اس شعر کا مطلب یہ نہیں کہ معاذ اللہ رب تعالیٰ فیصلہ فرمانے میں بندوں کی رضا کا محتاج ہے بلکہ اس شعر کا مطلب یہ ہے کہ نیک لوگوں کے لئے بعض دفعہ ایسا وقت آتا ہے کہ رب تعالیٰ ان کی رضا کے مطابق ان کو عطا کرتا ہے، اس اعتبار سے علمائے کرام نےمذکورہ شعر کو استعمال فرمایا ہے، اس اعتبار سے مذکورہ شعر پڑھنا درست ہے۔

   مفتی احمد یار خان نعیمی رحمۃ اللہ تعالی علیہ مراٰۃ المناجیح میں ایک حدیث کی شرح میں یہ شعر(خودی کو کر بلند اتنا کہ ہر تقدیر سے پہلے۔خدا بندے سے خود پوچھے بتا تیری رضا کیاہے) تحریر فرمایا اور پھر آگے ارشاد فرماتے ہیں: ”بندے پر بعض وقت ایسے آتے ہیں کہ رب تعالیٰ بندے کی رضا چاہتا ہے۔وَ لَسَوْفَ یُعْطِیۡکَ رَبُّکَ فَتَرْضٰی(اور قریب ہے کہ تمہارا رب تمہیں اتنا دے گا کہ تم راضی ہوجاؤ گے)اور حضرت ابوبکر صدیق کے لیے فرماتا ہے: وَ لَسَوْفَ یَرْضٰی(اور بےشک قریب ہے کہ وہ راضی ہوگا)۔“(مراٰۃ المناجیح، جلد7، صفحہ134، حسن پبلشرز ، لاھور)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم