Tahajjud Ki Aadat Bana Kar Us Ko Chorne Ka Hukum

   کہا جاتا ہے جب ایک دفعہ تہجد کی نماز شروع کر لی جائے تو اس کو چھوڑا نہ جائے بلکہ  اس کو ہمیشہ پڑھتے ہی رہنا چاہئے اگر چھوڑیں گے تو گناہ ہو گا کیا یہ درست ہے؟

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   تہجد کی نماز کے بے شمار فضائل و برکات ہیں مگر یہ نماز ہم پر فرض و واجب نہیں کہ اگر کوئی چھوڑدے تو گنہگار قرار پائے البتہ حدیث پاک کی روشنی میں جو شخص تہجد کا عادی ہو اسے بلاعذر محض سستی کے سبب تہجد چھوڑنا اچھا عمل نہیں ہے ۔  اگر کوئی عذر ہو تو کوئی حرج نہیں۔ البتہ یہ بات بھی ذہن نشین رہنی چاہیے کہ صرف اس وجہ سے نماز تہجد سے رکے رہنا کہ بعد میں ساری زندگی پڑھنی ہو گی، درست سوچ نہیں۔ بالفرض عمل میں سستی ہو جاتی ہو تو بھی موقع ملنے پر بلکہ کوشش کر کے تہجد کی نماز ادا کرنی چاہیے ۔

   بہار شریعت میں ہے :” جو شخص تہجد کا عادی ہو بلا عذر اُسے چھوڑنا مکروہ ہے۔ کہ صحیح بخاری و مسلم کی حدیث میں ہے حضور اقدس صلی اللہ تعالیٰ علیہ وسلم نے عبداللہ بن عمر رضی اللہ تعالیٰ عنہما سے ارشاد فرمایا: اے عبداللہ! تو فلاں کی طرح نہ ہونا کہ رات میں اُٹھا کرتا تھا پھر چھوڑ دیا۔ نیز   بخاری و مسلم وغیرہما میں ہے فرمایا کہ اعمال میں زیادہ پسند اللہ عزوجل کو وہ ہے جو ہمیشہ ہو، اگرچہ تھوڑا ہو۔“(بہار شریعت ،جلد1،صفحہ 678، مکتبۃ المدینہ، کراچی)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم