بِسْمِ اللہِ الرَّحْمٰنِ الرَّحِيْمِ
دارالافتاء اہلسنت (دعوت اسلامی)
کیا مسجد کو پیغمبر سے اونچا درجہ دیا گیا ہے؟
انبیائے کرام علیہم الصلوٰۃ و السلام تمام مخلوقات سے افضل ہیں۔ مساجد کا درجہ انبیائے کرام علیہم الصلوٰۃ و السلام سے زیادہ ہرگز نہیں، بلکہ ایک حدیث میں کعبہ شریف کو خطاب کرتے ہوئے نبی کریم صلی اللہ علیہ و اٰلہٖ و سلم نے فرمایا: ایک مومن کی حرمت تجھ سے زیادہ ہے۔ تو جب ایک مومن کی حرمت و عظمت کا یہ عالم ہے، تو نبی علیہ السلام کے مقام کا کیا پوچھنا۔
سنن ابنِ ماجہ میں حضرت عبد اللہ بن عمر رضی اللہ عنہما سے مروی ہے، فرماتے ہیں کہ میں نے رسول اللہ صلی اللہ علیہ و سلم کو کعبہ کا طواف کرتے دیکھا، وہ فرما رہے تھے:
ما أطيبك و أطيب ريحك ! ما أعظمك و أعظم حرمتك! والذي نفس محمد بيده لحرمة المؤمن أعظم عند الله حرمة منك
یعنی( اے کعبہ) تُو کیسا پاکیزہ ہے! تیری خوشبو کیسی پاکیزہ ہے! تُو کیسا عظیم ہے! تیری عزَّت بھی کتنی بلند ہے! اُس ذات کی قسم جس کے قبضے میں محمد (صلی اللہ عَلَیْہِ وَ آلِہٖ وَسَلَّم) کی جان ہے، بےشک ایک مؤمن کی عزَّت اللہ پاک کے ہاں تیری عزَّت سے زیادہ ہے۔ (سنن ابن ماجہ، صفحہ 606 حدیث: 3932، مطبوعہ: ریاض)
وَاللہُ اَعْلَمُ عَزَّوَجَلَّ وَ رَسُوْلُہ اَعْلَم صَلَّی اللہُ تَعَالٰی عَلَیْہِ وَاٰلِہٖ وَ سَلَّم
مجیب: مولانا جمیل احمد غوری عطاری مدنی
فتویٰ نمبر: Web-1885
تاریخ اجراء: 29 صفرالمظفر1446ھ / 04 ستمبر2024ء
