مجیب:مولانا محمد بلال عطاری مدنی
فتوی نمبر:WAT-3714
تاریخ اجراء:11شوال المکرم 1446ھ/10اپریل2025ء
دارالافتاء اہلسنت
(دعوت اسلامی)
سوال
23 رمضان المبارک کو ہماری مسجد کو تعمیرکرنے کے لئے شہید کر دیا گیا اور اعتکاف والوں کو دوسری مسجد میں منتقل کردیا گیا،تو کیا ان کا اعتکاف ٹوٹ گیا؟
بِسْمِ اللہِ الرَّحْمٰنِ الرَّحِیْمِ
اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ
اگر واقعی مسجد شہید ہوگئی اور اعتکاف کرنے والے فورا دوسری مسجد میں چلے گئے،تو ان کا اعتکاف نہیں ٹوٹا۔
فتاوی ہندیہ میں ہے
” فإن خرج من المسجد بعذر بأن انهدم المسجد أو أخرج مكرها فدخل مسجدا آخر من ساعته لم يفسد اعتكافه استحسانا هكذا في البدائع“
ترجمہ:معتکف اگر مسجد سے عذر کی وجہ سے نکلا مثلاً مسجد شہید ہوگئی یا اسے زبردستی نکال دیا گیا اور وہ فوراً دوسری مسجد میں داخل ہوگیا تو استحسانا اس کا اعتکاف نہیں ٹوٹے گا،جیسا کہ بدائع میں ہے۔(فتاوی ھندیۃ،کتاب الصوم،مسائل فی الاعتکاف،ج 1،ص 212،دار الفکر، بیروت)
بہار شریعت میں ہے" اگر وہ مسجد گر گئی یا کسی نے مجبور کر کے وہاں سے نکال دیا اور فوراً دوسری مسجد میں چلا گیا، تو اعتکاف فاسد نہ ہوا۔"(بہار شریعت،ج01،حصہ 5،ص1025، مکتبۃ المدینہ)
وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم