مجیب:مولانا احمد سلیم عطاری مدنی
فتوی نمبر:WAT-3625
تاریخ اجراء:07 رمضان المبارک 1446 ھ/08 مارچ 2025 ء
دارالافتاء اہلسنت
(دعوت اسلامی)
سوال
کیا سجدے میں سبحان اللہ کہنے سے نماز ٹوٹ جاتی ہے؟
بِسْمِ اللہِ الرَّحْمٰنِ الرَّحِيْمِ
اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ
نماز میں اگر کسی تعجب خیز چیز کو دیکھ کر یا اس کے متعلق سن کر جواب کی نیت سے سبحان اللہ کہا جائے، تو اس صورت میں نماز ٹوٹ جائے گی، ورنہ نہیں۔
فتاوی ہندیہ میں ہے ”و إذا أخبر بما يعجبه فقال: سبحان الله أو لا إله إلا الله أو الله أكبر إن لم يرد به الجواب لا تفسد صلاته عند الكل و إن أراد به الجواب فسدت عند أبي حنيفة و محمد رحمهما الله تعالى. هكذا في الخلاصة“ ترجمہ: جب نمازی کو کسی تعجب خیز بات کی خبر دی گئی، تو اس نے اگر جواب کے ارادے کے بغیر سبحان اللہ،یا لا الہ الا اللہ،یا اللہ اکبر کہا ، تو سب کے نزدیک نماز فاسد نہیں ہو گی اور اگر جواب کے ارادے سے کہا، تو طرفین رحمھما اللہ کے نزدیک نماز فاسد ہو جائے گی۔ (فتاوی ہندیہ، ج 1، ص 99، دار الفکر، بیروت)
بہارِ شریعت میں ہے"کوئی چیز تعجب خیز ديکھ کر بقصد جواب سُبْحَانَ اللہ یا لَا اِلٰـہَ اِلَّا اللہُ یا اَللہُ اَکْبَر کہا، نماز فاسد ہوگئی،ورنہ نہیں۔" (بہار شریعت، ج 1، حصہ 3، ص 605 ،606، مکتبۃ المدینہ)
وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم