شرعی فقیر کے گھر کا رینٹ زکوۃ کی نیت سے ادا کرنا
بِسْمِ اللہِ الرَّحْمٰنِ الرَّحِيْمِ
شرعی فقیر کے گھر کا رینٹ زکوۃ کی نیت سے ادا کرنا
دارالافتاء اہلسنت (دعوت اسلامی)
سوال
اگر کسی رشتہ دار کا ماہانہ رینٹ زکوۃ کی نیت سے مالک مکان کو دیں تو کیا زکوۃ ادا ہوجائے گی ؟ ترکیب یہ ہے کہ گھر کے افراد ایک شخص کو زکوۃ جمع کرادیتے ہیں اور وہ ڈائریکٹ ہی مذکورہ رشتہ دار کا رینٹ آن لائن مالک مکان کو ادا کردیتا ہے یعنی رشتہ دار کے ہاتھ میں زکوۃ کی رقم نہیں دیتا، اس کی وجہ یہ ہے کہ مذکورہ رشتہ دار سے غالب گمان ہے کہ وہ زکوۃ کی رقم کہیں اور خرچ کردے گا اور رینٹ کی رقم اس کے پاس نہیں بچے گی اور اگر کرایہ نہیں ادا کرے گا تو مالک مکان اسے گھر سے نکا ل دے گا، تو شرعی رہنمائی درکار ہے کہ کیا یوں زکوۃ اد اہوجائے گی ؟
جواب
اگر آپ کایہ رشتہ دار زکوۃ لینے کا مستحق ہو (یعنی شرعی فقیر ہو اور ہاشمی یا سید نہ ہو) اور آپ اس کی اجازت سے زکوۃ کی رقم سے ڈائریکٹ (یعنی اس کو قبضہ دئیے بغیر) اس کا کرایہ ادا کریں تواس طرح زکوۃ ادا ہوجائے گی اور اگر بغیر اجازت ادا کریں تو زکوۃ ادا نہیں ہوگی، کیونکہ زکوٰۃ کا رکن ہے فقیرِ شرعی کو مالک بنانا اور مالک بنانے کے لیے خود فقیر شرعی یا اس کے نائب کا اس مال پر قبضہ کرنا ضروری ہے، اب جس صورت میں اس کی اجازت سے اس کا کرایہ ادا کیا جائے گا تواس صورت میں مالک مکان اس رشتہ دارک انائب ہوگا اور اس کے قبضہ کرنے سے رشتہ دار کاقبضہ ہوجائے گا جبکہ بغیر اجازت، ڈائریکٹ کرایہ اداکرنے کی صورت میں مالک مکان اس رشتہ دار کانائب نہیں بنے گا تو کسی طور پر بھی اس کا قبضہ ثابت نہیں ہوگا، لہذا زکوۃ بھی ادانہیں ہوگی ۔
زکوٰۃ کا رکن فقیرِ شرعی کو مالک بنانا ہے، جیسا کہ بدائع الصنائع میں ہے :
”و قد امر اللہ تعالی الملاک بایتاء الزکاۃ لقولہ عز وجل ﴿ وَ اٰتُوا الزَّكٰوةَ ﴾ و الایتاء ھو التملیک“
ترجمہ : اللہ تعالی نے مال والوں کو زکوٰۃ دینے کا حکم دیا ہے، چنانچہ فرمانِ باری عزوجل ہے: ﴿ وَ اٰتُوا الزَّكٰوةَ ﴾ ( یعنی زکوٰۃ دو ) اور ایتاء یعنی دینے کا مطلب ہی مالک کر دینا ہوتا ہے۔ (بدائع الصنائع ، کتاب الزکاۃ ، فصل رکن الزکاۃ ، ج 2 ، ص 39،دار الکتب العلمیۃ،بیروت)
سیدی اعلیٰ حضرت امام اہلسنت مولانا الشاہ امام احمد رضا خان علیہ رحمۃ الرحمٰن فتاویٰ رضویہ میں فرماتے ہیں:” زکوٰۃ کا رکن تملیکِ فقیر ( یعنی فقیر کو مالک بنانا ) ہے ۔ جس کام میں فقیر کی تملیک نہ ہو ، کیسا ہی کارِ حَسن ہو جیسے تعمیرِ مسجد یا تکفینِ میت یا تنخواہِ مدرسانِ علمِ دین، اس سے زکوٰۃ نہیں ادا ہوسکتی۔(فتاوی رضویہ ، جلد 10 ، صفحہ 269 ، رضا فاؤنڈیشن ، لاھور)
شرعی فقیر مقروض کی طرف سے قرض خواہ قبضہ کر لے تو زکوٰۃ ادا ہوجانے سے متعلق بحر الرائق میں ہے
’’لو قضى دين الحي ۔۔۔ إن قضاه بأمره جاز، ويكون القابض كالوكيل له في قبض الصدقة كذا في غاية البيان وقيده في النهاية بأن يكون المديون فقيرا "
ترجمہ : زندہ شخص کی اجازت سے اگر ( کسی نے مالِ زکوٰۃ سے ) اس کا قرض ادا کر دیا ، تو جائز ہے ( یعنی زکوٰۃ ادا ہوجائے گی ) اور قبضہ کرنے والا ( قرض خواہ ) مقروض کی طرف سے صدقہ میں قبضہ کے وکیل کی طرح ہوگا۔ جیسا کہ غایۃ البیان میں ہے ۔ نہایہ میں اس چیز کی قید لگائی ہے کہ مقروض فقیرِ شرعی ہو ۔(البحر الرائق ، کتاب الزکاۃ، باب مصرف الزکاۃ، جلد 2 ، صفحہ 261 ، دار الكتاب الإسلامي)
در مختار میں ہے : ’’دین الحي الفقير فيجوز لو بأمره‘‘ ترجمہ : زندہ فقیرِ شرعی کی اجازت سے اس کا دَین ادا کر دیا تو جائز ہے ۔
رد المحتار میں ہے:
”(فیجوز لو بامرہ) ای یجوز عن الزکاۃ علی انہ تملیک منہ والدائن یقبضہ بحکم النیابۃ عنہ ثم یصیر قابضا لنفسہ“
ترجمہ: (اس کی اجازت سے ادا کرنا جائز ہے) یعنی زکوۃ کے طور پر جائز ہوجائے گا اس بناء پر کہ اس (زکوٰۃ دینے والے) کی طرف سے مالک بنانا پایا گیا اور قرض خواہ نیابت کے طور پر مقروض کی طرف سے قبضہ کرے گا، پھر (گویا کہ) یہ مقروض کا اپنا قبضہ کرنا ہی شمار ہو گا۔ (رد المحتار علی الدر المختار، جلد 3، صفحہ 342، مطبوعہ کوئٹہ)
وَ اللہُ اَعْلَمُ عَزَّ وَ جَلَّ وَ رَسُوْلُہ اَعْلَم صَلَّی اللہُ تَعَالٰی عَلَیْہِ وَ اٰلِہٖ وَ سَلَّم
مجیب: ابو شاھد مولانا محمد ماجد علی مدنی
فتویٰ نمبر: WAT-3666
تاریخ اجراء: 28 رمضان المبارک 1446ھ/29 مارچ 2025ء