مجیب:مفتی محمد قاسم عطاری
فتوی نمبر:FAM-490
تاریخ اجراء:22 محرم الحرام6144ھ/29 جولائی2024
دارالافتاء اہلسنت
(دعوت اسلامی)
سوال
کیا فرماتے ہیں علمائے دین ومفتیان شرع متین اس مسئلے کے بارے میں کہ احرام کی حالت میں نماز میں سجدہ کی ادائیگی کے دوران اگر لیڈیز کا اسکارف، یا دوپٹہ منہ پر لگ جائے تو کیا معاملہ ہوگا؟
بِسْمِ اللہِ الرَّحْمٰنِ الرَّحِيْمِ
اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ
ایسی صورت میں اگر اُس اسکارف یا دوپٹے سے مُحرِم کا پورا چہرہ، یا چہرے کا کم از کم چوتھائی حصہ چھپ جائے ، تو اگرچہ یہ چھپنا ایک لمحے کے لیےہی ہو، مُحرِم پراِس کی وجہ سے کفارے میں ایک صدقہ فطر لازم ہوگا۔ ہاں اگر مُحرِم کے چہرے کا چوتھائی سے بھی کم حصہ چھپا ہو، تو اب اس صورت میں مُحرِم پر کوئی کفارہ لازم نہیں ہوگا۔ پھر چونکہ اس طرح نماز کے دوران اسکارف یا دوپٹے سے چہرہ چھپنے میں مُحرِم کا اپنا کوئی قصد و ارادہ نہیں، لہذابہرصورت اس میں گناہ نہیں۔ نیز چہرہ چھپنے کی جس صورت میں مُحرِم پر صدقہ لازم ہو، تو اس میں صدقہ کی ادائیگی حرم میں کرنا ضروری نہیں، بلکہ اپنے ملک میں کسی شرعی فقیر کو بھی صدقہ دیا جاسکتا ہے، مگر مکہ پاک کے شرعی فقیر کو صدقہ دینا افضل ہے۔
حالت احرام میں سر، یا چہرے کے چھپ جانے کے متعلق لباب المناسک اور اس کی شرح میں ہے:’’(ولو غطی جمیع رأسہ أو وجھہ بمخیط أو غیرہ یوما أو لیلۃ فعلیہ دم وفی الأقل من یوم)وکذا من لیلۃ(صدقۃ والربع منھما کالکل)‘‘ترجمہ:اگر محرم نے اپنا پورا سر، یا چہرہ سلے ہوئے کپڑے یا اس کے علاوہ سے ایک دن یا ایک رات چھپایا تو اس پر دم لازم ہے اور ایک دن یا ایک رات سے کم چھپایا تو صدقہ لازم ہے اور چوتھائی سر اور چہرہ پورے سر اور چہرے کی طرح ہے۔(لباب المناسک مع شرحہ، باب الجنایات،صفحہ435،مطبوعہ مکۃ المکرمہ)
صدر الشریعہ مفتی محمد امجد علی اعظمی رحمۃ اللہ علیہ بہار شریعت میں ارشاد فرماتے ہیں:”مرد یا عورت نے مونھ کی ٹکلی ساری یا چہارم چھپائی، یا مرد نے پورا یا چہارم سر چھپایا تو چار پہر یا زیادہ لگاتار چھپانے میں دَم ہے اور کم میں صدقہ اور چہارم سے کم کو چار پہر تک چھپایا تو صدقہ ہے اور چار پہر سے کم میں کفارہ نہیں مگر گناہ ہے۔“(بھار شریعت، جلد1، حصہ6، صفحہ1169، مکتبۃ المدینہ، کراچی)
جنایت کے وقوع میں جب مُحرم کا قصد وارادہ نہ ہو تو مُحرم گنہگار نہیں ہوگا، چنانچہ لباب المناسک میں ہے: ’’المحرم اذا جنی بغیر عمد أو بعذر فعلیہ الجزاء دون الاثم‘‘ترجمہ:جب محرم بغیر قصد کے یا کسی عذر کی وجہ سے جنایت کرے تو اس پر کفارہ لازم ہوگا،(مگر)گناہ نہیں ہوگا۔(لباب المناسک مع شرحہ، باب الجنایات، صفحہ422، مطبوعہ مکۃ المکرمہ)
صدقہ کی ادائیگی حرم میں ضروری نہیں، اپنے شہر کے شرعی فقیر کو بھی دے سکتے ہیں ،مگر مکہ پاک کے شرعی فقیر کو دینا افضل ہے، چنانچہ تنویر الابصار مع درِ مختار ورد المحتارمیں ہے :وبین القوسین عبارۃرد المحتار:”تصدق بنصف صاع من بركالفطرة ۔۔۔ أين شاء( أي في غير الحرم أو فيه ولو على غير أهله لإطلاق النص، بخلاف الذبح والتصدق على فقراء مكة أفضل)“ ترجمہ: صدقۂ فطر کی طرح آدھا صاع گندم صدقہ کرے ، جہاں چاہے یعنی حرم کے علاوہ یا حرم میں ، اگرچہ حرم کے فقیر کے علاوہ کسی دوسرے فقیر پر کیونکہ اس بارے میں نص مطلق ہے ، برخلاف جانور ذبح کرنے کے۔ اور مکہ مکرمہ کے فقیروں پر صدقہ کرنا افضل ہے۔(تنویر الابصار مع در مختار ورد المحتار ، جلد3 ، صفحہ672-671، مطبوعہ کوئٹہ)
وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم