دار الافتاء اھلسنت (دعوت اسلامی)
عمرہ کر کے میدانِ عرفات کی زیارت کے لیےجا رہے ہیں، تو کیا وہاں سے واپسی پر احرام باندھنا ہوگا؟
بِسْمِ اللہِ الرَّحْمٰنِ الرَّحِيْمِ
اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَايَةَ الْحَقِّ وَ الصَّوَابِ
عمرہ کر کے زیارت کے لیے میدانِ عرفات میں چلے گئے، لیکن میقات سے باہر نہ گئے، تو واپسی پر احرام باندھنا ضروری نہیں، بغیر احرام باندھے بھی واپس آنا، جائز ہے، جبکہ واپسی پر عمرہ کرنے کا کوئی ارادہ نہ ہو۔ ہاں! اگر واپسی پر عمرہ کی نیت ہو، تو اب حدودِ حرم سے باہر کسی مقام سےاحرام باندھ کر آنا ضروری ہوگا۔
حرم سے باہر حل میں کسی مقام پر گیا، تو واپسی پر احرام باندھنا ضروری نہیں۔ بغیر احرام واپس آنا، جائز ہے، اس کے متعلق بدائع الصنائع میں ہے
لو خرج من الحرم إلى الحل و لم يجاوز الميقات ثم أراد أن يعود إلى مكة، له أن يعود إليها من غير إحرام؛ لأن أهل مكة يحتاجون إلى الخروج إلى الحل للاحتطاب و الاحتشاش و العود إليها، فلو ألزمناهم الإحرام عند كل خروج لوقعوا في الحرج
ترجمہ: اگر حرم سے حل کی طرف نکلا اور میقات سے تجاوز نہ کیا پھر مکہ کی طرف لوٹنا چاہتا ہے، تو اسے بغیر احرام لوٹنا جائز ہے کیونکہ اہلِ مکہ کولکڑیاں چننے یا گھاس جمع کرنے کے لئے حل کی طرف جانے اور پھر واپس آنے کی حاجت ہوتی ہے، تو اگر ہم ہر بار جانے پر اُن پر احرام کو لازم قرار دیں، تو وہ حرج میں پڑ جائیں گے۔ (بدائع الصنائع، جلد 2، صفحہ 167، دار الکتب العلمیۃ، بیروت)
تنویر الابصار ودرِ مختار میں ہے
(حل لاھل داخلھا)یعنی لکل من وجد فی داخل المواقیت (دخول مکۃ غیر محرم) ما لم یرد نسکا
ترجمہ: ہر وہ شخص جو میقات کے اندر موجود ہو،اسے بغیراحرام مکہ میں داخل ہونا، جائز ہے بشرطیکہ اس کاحج یا عمرہ کرنے کا ارادہ نہ ہو۔
اس پر علامہ ابنِ عابدین شامی رحمۃ اللہ علیہ ارشاد فرماتے ہیں:
اما ان ارادہ وجب علیہ الاحرام قبل دخولہ ارض الحرم فمیقاتہ کل الحل الی الحرم
ترجمہ: بہرحال اگر اس کا حج یا عمرہ کرنے کا ارادہ ہو، تو زمینِ حرم میں داخل ہونے سےپہلے اس پر احرام واجب ہے، پس اس کا میقات تمام حِل ہے حرم تک۔ (ردالمحتار علی الدر المختار، جلد 2، صفحہ 478، دار الفکر، بیروت)
وَ اللہُ اَعْلَمُ عَزَّ وَ جَلَّ وَ رَسُوْلُہ اَعْلَم صَلَّی اللہُ تَعَالٰی عَلَیْہِ وَ اٰلِہٖ وَ سَلَّم
مجیب: مولانا محمد نوید چشتی عطاری مدنی
فتویٰ نمبر: WAT-4091
تاریخ اجراء: 09 صفر المظفر 1447ھ / 04 اگست 2025ء