منت کے تیس روزے ایک ساتھ رکھنے ہوں گے؟

پوچھی گئی صورت میں اگر مسلسل روزہ رکھنے کی دل میں نیت کی تھی یا زبان سے لفظ بولا تھا، تو اب منت کے 30 روزے مسلسل رکھنا ہوں گے۔ لیکن اگر زبان سے بھی مسلسل رکھنے کا کوئی لفظ نہیں بولا اور نہ ہی دل میں لگاتار رکھنے نیت تھی، تو اب لگاتار رکھنا ضروری نہیں وقفے وقفے سے بھی 30 روزے رکھے جاسکتے ہیں۔

بہار شریعت میں ہے: ”پے درپے کی شرط لگائی یا دل میں نیّت کی تو یہ بھی ضرور ہے کہ ناغہ نہ ہونے پائے اگر ناغہ ہوا، اگرچہ ایّام منہیّہ میں تو اب سے ایک مہینے کے علی الاتصال روزے رکھے یعنی یہ ضرور ہے کہ ان تیس دنوں میں کوئی دن ایسا نہ ہو، جس میں روزہ کی ممانعت ہے اور پے در پے کی نہ شرط لگائی، نہ نیّت میں ہے تو متفرق طور پر تیس روزے رکھ لینے سے بھی منت پوری ہو جائے گی۔ اور اگر عورت نے ایک ماہ پے در پے روزے رکھنے کی منّت مانی تو اگر ایک مہینہ یا زیادہ طہارت کا زمانہ اُسے ملتا ہے تو ضرور ہے کہ ایسے وقت شروع کرے کہ حیض آنے سے پیشتر تیس دن پورے ہو جائیں، ورنہ حیض آنے کے بعد اب سے تیس پورے کرنے ہوں گے اور اگر مہینہ پورا ہونے سے پہلے اُسے حیض آجایا کرتا ہے تو حیض سے پہلے جتنے روزے رکھ چکی ہے، انہیں حساب کر لے جو باقی رہ گئے، انہیں حیض ختم ہونے کے بعد متصلاً بلاناغہ پورا کرلے۔“ (بہار شریعت، جلد 1، صفحہ 1017، مکتبۃ المدینہ)

وَاللہُ اَعْلَمُ عَزَّ وَجَلَّ وَرَسُوْلُہ اَعْلَم صَلَّی اللہُ تَعَالٰی عَلَیْہِ وَاٰلِہٖ وَسَلَّم

مجیب: مولانا رضا محمد عطاری مدنی

فتوی نمبر: Web-2616

تاریخ اجراء:01 جمادی الاولٰی 1447ھ/24 اکتوبر 2025ء