Ihram Bandha or Nikalne se Pehle Haiz Aa Gaya to Kya Hukum Hai?

عمرہ کا احرام باندھ لیا لیکن روانگی سے پہلے حیض آگیا، تو حکم

مجیب:مولانا محمد کفیل رضا عطاری مدنی

فتوی نمبر:Web-1855

تاریخ اجراء:16صفر المظفر1446ھ/22اگست2024ء

دارالافتاء اہلسنت

(دعوت اسلامی)

سوال

اگر کسی خاتون نے عمرہ کی نیت سے احرام باندھ لیا، نفل بھی ادا کر لئے اور تلبیہ بھی کہہ لیا،لیکن جانے سے چند منٹ پہلے اسے حیض آنا شروع ہوگیا،تو کیا اس پر اس عمرہ کی قضا لازم ہوگی اور دوسرا سوال یہ ہے کہ اگر حیض کی حالت میں مدینہ منورہ حاضری ہو، تو کیا مسجدِ نبوی کے صحن میں جا سکتی ہے؟

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

احرام باندھ لینے کے بعدحیض آ جانے سے احرام کی پابندیاں ختم نہیں ہوتی، نہ ہی اس وجہ سے عمرہ کی قضا کرنی ہوتی ہے، بلکہ ایسی صورت میں حکم یہ ہے کہ عورت عمرہ پر جائے اور ہوٹل وغیرہ میں ہی رہے، مسجد حرام یا کسی بھی مسجد میں داخل نہیں ہوسکتی نہ ہی طواف وغیرہ کر سکتی ہے بلکہ اپنے پاک ہونے کا انتظار کرے، اس دوران احرام کی پابندیاں لازم رہیں گی،پھر جب پاک ہوجائے، تو غسل کرکے تمام افعالِ عمرہ اداکرکے عمرہ مکمل کرے۔

یہی حکم مدینہ شریف جاکر مسجد نبوی علی صاحبہا الصلوٰۃ و السلام کی حاضری کا ہے کہ ناپاکی کی حالت میں اندورنِ مسجد نہیں جاسکتی۔ البتہ مسجد نبوی شریف کے بیرونی صحن(یعنی فنائے مسجد یا خارج مسجد) میں بیٹھ کر روضہ رسول کی زیارت کرنا چاہےیا وہاں سے سلام پیش کرنا چاہے، تو کر سکتی ہے۔