بِسْمِ اللہِ الرَّحْمٰنِ الرَّحِيْمِ
دارالافتاء اہلسنت (دعوت اسلامی)
کیا فرماتے ہیں علمائے دین و مفتیان شرع متین اس مسئلے کے بارے میں کہ کیا احرام کی حالت میں چشمہ پہن سکتے ہیں؟ نیز کیا دعا کے بعد ہاتھ منہ پر پھیر سکتے ہیں؟
چشمہ چاہے نظر کا ہو، یا دھوپ سے بچنے کے لیے ہو، بہرحال احرام کی حالت میں چشمہ پہن سکتے ہیں کہ چشمے سے مقصد چہرہ چھپانا نہیں ہوتا۔ اسی طرح احرام کی حالت میں دعا کے بعد منہ پر ہاتھ بھی پھیر سکتے ہیں، اس میں بھی کوئی حرج نہیں ہے کہ چہرے پر بغیر کسی کپڑے کے ہاتھ رکھنے یا پھیرنے کو عرف و عادت میں چہرہ چھپانا یا ڈھانپنا نہیں کہا جاتا۔ البتہ داڑھی ہونے کی صورت میں ہاتھ پھیرنے پر بالوں کے ٹوٹنے کا اندیشہ ہے، لہذا احرام کی حالت میں اس احتیاط کے ساتھ چہرے پر ہاتھ پھیرا جائے کہ کوئی بال نہ ٹوٹے۔
در مختار میں ہے:
و لا بأس بتغطية أذنيه وقفاه و وضع يديه على أنفه بلا ثوب
ترجمہ: اور (حالت احرام میں) اپنے کانوں اور اپنی گدی کو ڈھانپنے اور اپنے ہاتھ کو ناک پر بغیر کپڑے کے رکھنے میں کوئی حرج نہیں۔(در مختار، جلد 3، باب الجنایات، صفحہ 659، دار المعرفۃ، بیروت)
مباحات ِاحرام یعنی احرام میں جائز امور کے متعلق لباب المناسک اور اس کی شرح میں ہے:
(و وضع یدہ أو ید غیرہ علی رأسہ أو أنفہ) أی بالاتفاق لانہ لا یسمی لابسا للرأس ولا مغطیا للأنف
ترجمہ:اور اپنا یا دوسرے کا ہاتھ اپنے سر یا ناک پر رکھنا بالاتفاق جائز ہے کیونکہ اس کوسر ڈھانپنا نہیں کہا جاتا اور نہ ہی یہ ناک کو ڈھانپنا کہلاتا ہے۔ (لباب المناسک مع شرحہ، فصل فی مباحاتہ، صفحہ 136، دار الکتب العلمیہ، بیروت)
رفیق الحرمین میں ایک سوال کے جواب میں ہے: (محرم دُعا مانگنے کے بعد اپنے ہاتھ مُنہ پر) پھیر سکتا ہے، منہ پر ہاتھ رکھنے کی مُطْلَقًا اجازت ہے، (البتہ) داڑھی والا اسلامی بھائی منہ پر بعدِ دُعا بلکہ وُضو میں بھی اِس انداز میں (چہرے پر) ہاتھ مَلنے سے بچے جس سے بال گرنے کا اندیشہ ہو۔ (رفیق الحرمین، صفحہ 310، مکتبۃ المدینہ، کراچی)
وَ اللہُ اَعْلَمُ عَزَّ وَ جَلَّ وَ رَسُوْلُہ اَعْلَم صَلَّی اللہُ تَعَالٰی عَلَیْہِ وَ اٰلِہٖ وَ سَلَّم
مجیب: مفتی محمد قاسم عطاری
فتویٰ نمبر: FAM-651
تاریخ اجراء: 28 رجب المرجب 1446ھ / 29 جنوری 2025ء
